આરોગ્ય વીમા પર GST શૂન્ય ? પ્રીમિયમ ઘટ્યું, કવરેજ વધ્યું અને લોકોનો વિશ્વાસ પાછો આવ્યો

ક્યારેક એવું લાગતું નથી કે બીમારીનો ડર બીમારી કરતાં પણ મોટો હોય છે? સારવાર મોંઘી છે, હોસ્પિટલના બિલ ડરાવે છે અને આરોગ્ય વીમો હોવા છતાં પ્રીમિયમ ભારે લાગે છે. પણ હવે વાત બદલાઈ રહી છે. આરોગ્ય વીમા પર GST શૂન્ય થતા લોકો માત્ર વીમો લઈ રહ્યા નથી, પણ પહેલા કરતાં વધુ સુરક્ષા પસંદ કરી રહ્યા છે. removal GST health insurance benefits

એક તાજા અહેવાલ પ્રમાણે, GST નાબૂદ થતાં આરોગ્ય વીમાનું ચિત્ર જ બદલાઈ ગયું છે. પ્રીમિયમ ઘટ્યું, લોકોનો આત્મવિશ્વાસ વધ્યો અને સૌથી મહત્વનું—કવરેજની રકમમાં મોટો ઉછાળો આવ્યો.

GST શૂન્ય થતાં આરોગ્ય વીમામાં ખરેખર શું ફેરફાર આવ્યો?

• અહીં વાત માત્ર બચતની નથી, વાત સુરક્ષાની છે. GST દૂર થતાં સરેરાશ આરોગ્ય વીમા કવર 31 ટકા વધ્યું છે.
• Policybazaarના અહેવાલ મુજબ, GST પહેલાં જ્યાં સરેરાશ આરોગ્ય વીમા કવર ₹14.5 લાખ હતું, તે હવે વધીને ₹19 લાખ થયું છે.

આનો અર્થ સ્પષ્ટ છે.
પ્રીમિયમ ઓછું થયું એટલે લોકો હવે ઓછામાં સંતોષ માનતા નથી. તેઓ ભવિષ્યને ધ્યાનમાં રાખીને મોટું અને મજબૂત કવર પસંદ કરી રહ્યા છે.

મોટા કવરેજ તરફ સ્પષ્ટ પરિવર્તન

ડેટા ખૂબ જ સ્પષ્ટ સંકેત આપે છે. GST દૂર થયા પછી લોકોની પસંદગી બદલાઈ ગઈ છે.

• ₹10–25 લાખના આરોગ્ય વીમામાં 47 ટકા વધારો જોવા મળ્યો છે.
• ₹25 લાખ અને તેથી વધુના વીમામાં તો 85 ટકાનો તીવ્ર ઉછાળો આવ્યો છે.

અને રસપ્રદ વાત એ છે કે ₹10 લાખથી ઓછી રકમના વીમામાં 24 ટકા ઘટાડો થયો છે. એટલે લોકો હવે કહે છે—“થોડું નહીં, પૂરતું જોઈએ.”

2024 અને 2025ની સરખામણી શું કહે છે?

જો વર્ષવાર આંકડા જોઈએ તો વલણ વધુ સ્પષ્ટ બને છે.

• ₹10 લાખથી ઓછી પોલિસીઓમાં વર્ષ-દર-વર્ષે 29 ટકા ઘટાડો થયો છે.
• ₹10–25 લાખના કવરમાં 55.6 ટકા વધારો થયો છે.
• ₹25 લાખ અને તેથી વધુ કવરેજમાં 49.3 ટકા વધારો નોંધાયો છે.

આ આંકડા બતાવે છે કે લોકો હવે આરોગ્ય વીમાને ખર્ચ નહીં, પણ નિવેશ તરીકે જોઈ રહ્યા છે.