બેંક હડતાળ:SBI સહિતની સરકારી બેંકો કાલે બંધ રહેશે? ઘરેથી નીકળતા પહેલા જરૂર વાંચો

જો તમારી પાસે કોઈ તાત્કાલિક બેંકિંગ કામ છે, તો આજે જ પૂરુ કરી લેવું સમજદારીભર્યું રહેશે. આવતીકાલે 12 ફેબ્રુઆરી 2026ના રોજ દેશભરમાં બેંકિંગ સેવાઓ પર અસર થવાની સંભાવના છે. બેંક કર્મચારી યુનિયનોએ તેમની માંગણીઓને લઈને રાષ્ટ્રવ્યાપી હડતાળનું એલાન કર્યું છે. Nationwide bank strike on February 12, 2026

કઈ બેંકો પર અસર પડી શકે?

આ હડતાળની અસર State Bank of India, Punjab National Bank અને Bank of Baroda જેવી મોટી સરકારી બેંકો પર થવાની શક્યતા છે.

હાલમાં બેંક રજાની કોઈ સત્તાવાર જાહેરાત કરવામાં આવી નથી. પરંતુ મોટી સંખ્યામાં કર્મચારીઓ હડતાળમાં જોડાશે તો શાખાઓમાં તાળાબંધી જેવી સ્થિતિ કે પછી કાઉન્ટર સેવાઓ સંપૂર્ણ રીતે ખોરવાઈ શકે છે. કેટલાક બેંકો તરફથી ગ્રાહકોને સંભવિત અસુવિધા અંગે અગાઉથી ચેતવણી પણ આપવામાં આવી છે.

બેંક કર્મચારીઓ હડતાળ પર કેમ જઈ રહ્યા છે?

યુનિયનોએ હડતાળ પાછળ બે મુખ્ય કારણો રજૂ કર્યા છે:

નવા શ્રમ કાયદાઓ સામે વિરોધ
કર્મચારીઓનું કહેવું છે કે નવા શ્રમ કાયદાઓથી તેમના હકો પર અંકુશ આવી શકે છે. તેઓ આ કાયદાઓમાં ફેરફાર કે પાછા ખેંચવાની માંગ કરી રહ્યા છે.

૫ દિવસના કાર્ય સપ્તાહની માંગ

બેંક કર્મચારીઓ લાંબા સમયથી માંગ કરી રહ્યા છે કે અન્ય કોર્પોરેટ ક્ષેત્રની જેમ બેંકોમાં પણ ૫ દિવસનું કાર્ય સપ્તાહ લાગુ કરવામાં આવે, જેથી કામ-જીવન સંતુલન સુધરી શકે.

તો શું કાલે બેંકો સંપૂર્ણ બંધ રહેશે?

• ગ્રાહકોમાં સૌથી મોટો સવાલ આ જ છે. હાલની સ્થિતિ આ પ્રમાણે છે:
• સત્તાવાર રીતે રજા નથી: 12 ફેબ્રુઆરી જાહેર રજા નથી, એટલે બેંકો ખુલ્લી ગણાશે.
• પરંતુ કામકાજ પર અસર શક્ય: જો સ્ટાફનો મોટો હિસ્સો હડતાળ પર જાય, તો ચેક ક્લિયરિંગ, રોકડ જમા, પાસબુક અપડેટ જેવા કાઉન્ટર કામ બંધ થઈ શકે છે.
• ખાનગી બેંકો: HDFC Bank અને ICICI Bank જેવી ખાનગી બેંકો સામાન્ય રીતે કામ કરશે, કારણ કે તે હડતાળમાં સામેલ નથી.